jab koi rasta nahin hota
kaun mahw-e-dua nahin hota

log zulmat se yun hi nalan hain
roz-e-raushan mein kya nahin hota

tute taron ko chhu ke dekha hai
saz-e-dil be-sada nahin hota

har khushi dil se kyun laga baithen
kis mein gham ho pata nahin hota

aao mil baith lo ghadi-do-ghadi
us ghadi ka pata nahin hota

sard-mehri hamari aadat hai
warna zarre mein kya nahin hota

phir wahi shab wahi tawil safar
khatm ye silsila nahin hota