jaun kahan shuur-e-hunar kis ke pas hai
aankhen hain sab ke pas nazar kis ke pas hai

hadd-e-nazar mein manzil-e-maqsud hai magar
jaega kaun rakht-e-safar kis ke pas hai

zakhmon mein ho rahe hain izafe nae nae
lekin nahin khabar ki tabar kis ke pas hai

hum hain ba-qaul un ke agar tirgi-pasand
phir dosto kalid-e-sahar kis ke pas hai

main qamat-e-shajar ka pujari nahin 'asad'
mujh ko ye dekhna hai samar kis ke pas hai