jis mein na khushi ho wo mohabbat nahin achchhi
kulfat se jo khali ho wo rahat nahin achchhi

kahta hai hasinon ki mohabbat nahin achchhi
aur naseh-e-kam-fahm ye aadat nahin achchhi

tum par jo na aa jae to wo dil nahin achchha
tum par jo na mail ho tabiat nahin achchhi

be-dil liye dete ho jo tum ghairon ko bose
nuqsan hai is mein ye murawwat nahin achchhi

dilwaen mujhe galiyan ghairon se sar-e-bazm
o shokh ye dar-parda shararat nahin achchhi

diwane nahin hum jo giraftar-e-bala hon
waqif hain ki in zulfon ki ulfat nahin achchhi

'sabir' ne sar-e-bazm jo chheda to wo bole
kambakht yahi to teri aadat nahin achchhi

'sabir' shajar-e-khushk se ummid-e-samar kya
jo faiz se khali ho wo khidmat nahin achchhi