jis pe teri shamshir nahin hai
us ki koi tauqir nahin hai

us ne ye kah kar pher diya khat
khun se kyun tahrir nahin hai

zakhm-e-jigar mein jhank ke dekho
kya ye tumhaara tir nahin hai

zakhm lage hain khulne gulchin
ye to teri jagir nahin hai

shahr mein yaum-e-aman hai waiz
aaj teri taqrir nahin hai

udi ghata to wapas ho ja
aaj koi tadbir nahin hai

shahr mohabbat ka yun ujda
dur talak tamir nahin hai

itni haya kyun aaine se
ye to meri taswir nahin hai