jo bhi kahna ho wahan meri zabani kahna
log kuchh bhi kahen tum aag ko pani kahna

aaj wo shakhs zamane mein hai yakta kah do
jab koi dusra mil jae to sani kahna

gham agar palkon pe tham jae to aansu kahiyo
aur bah jae to maujon ki rawani kahna

jitna ji chahe use aaj haqiqat kah lo
kal use meri tarah tum bhi kahani kahna

ab to dhundla gaya yaadon ka har ek naqsh 'shamim'
phir wo de jae koi apni nishani kahna