kaise dil lagta haram mein daur-e-paimana na tha
is liye phir aae kabe se ki mai-khana na tha

tum ne dekhi hi nahin taqdir ki tarikiyan
ek andheri gor thi furqat mein kashana na tha

majma-e-bait-ul-haram ki dhum sunte the magar
ja ke jab dekha to un mein koi farzana na tha

hashr mein us shokh ka tarz-e-taghaful dekhna
mujh ko pahchana nahin haalanki begana na tha

hashr mein aakhir use bhi chhodte hi ban padi
khana-e-madfan bhi goya apna kashana na tha

aisi kya biti ki 'muztar' un buton par mar mita
jaan de deta wo kuchh aisa to diwana na tha