kante ko phul sang ko gauhar kaha gaya
is shahr mein gada ko sikandar kaha gaya

be-chehra log husn ka mear ban gae
parchhaiyon ko nur ka paikar kaha gaya

jallad ko masiha-nafas ki sanad mili
insan-dushmanon ko payambar kaha gaya

kuchh jis ke pas nish-o-namak ke siwa na tha
chaak-e-jigar ka us ko rafu-gar kaha gaya

kya shai hai maslahat bhi shab-e-tira-fam ko
danishwaron mein subh-e-munawwar kaha gaya

gunga hai kar raha hai ishaaron mein baat-chit
'sabir' ko kis bina pe sukhnawar kaha gaya