kanton jaisi tabiren thi phulon jaise khwab
hum ne chhoti umron mein bhi kya kya dekhe khwab

mujh ko is malbus mein dekh ke khush the sare log
aur kisi ne ye nahin puchha ladki tere khwab

ek jagah par sone wale bhi kab yakja the
apni apni ninden thin aur apne apne khwab

main hun ab is basti ki tabiron par mamur
log sunane aa jate hain ulte-sidhe khwab

ek sukut tha tariki thi waqt ki thahri sans
mitti ne barish dekhi thi ped ne dekhe khwab