khali sine mein dhadakte hue aawaze se
bhar gai umr meri sans ke khamiyaze se

muntazir hi na raha baam-e-tamanna pe koi
aur hawa aa ke guzarti rahi darwaze se

sham-e-sad-rang mere aaina-khane mein thahar
main ne taswir banani hai tere ghaze se

mujh ko aaya hi nahin jis ka yaqin aaj talak
wo khuda kitna bada hai mere andaze se

aur kuchh hath na aaya to meri aankhon ne
chun liye khwab hi bikhre hue shiraaze se