khuda ko bhule na jab tak hamein khuda na mila
ye muddaa bhi ba-juz tark-e-muddaa na mila

qadam qadam pe na kyun sajda-reziyan kar lun
huzur-e-husn ye mauqa mila mila na mila

kalim-e-tur ye kyun tur par giri bijli
nigah-e-naz ko kya koi ba-wafa na mila

uda ke le gai parwaz shauq-e-manzil tak
adam ki rah mein koi shikasta-pa na mila

qafas mein aae ajal ya maren nasheman mein
do-roza zist ka hum ko kahin maza na mila

junun-e-shauq ki khuddariyan maaz-allah
mizaj-dan koi 'qaisar' ko rahnuma na mila