khushiyan thin bewafa na rahin zindagi ke sath
gham ba-wafa the chalte rahe aadmi ke sath

dhalne lagi jawani jo aai thi chaar din
thahra budhapa qabr talak rahbari ke sath

andaz zindagi ke badal kar jiyo sada
apnon ki be-rukhi ko saho tum khushi ke sath

puja hai main ne roz-o-shab is qadar use
us ka hi nam likhti rahi shaeri ke sath

mujh ko 'saba' mili hai masarrat bhi is tarah
jaise ki ajnabi ho kisi ajnabi ke sath