khwabon ki dastaras mein na aankhon ki had mein hai
imkan-e-wasl gard-e-masafat ki zad mein hai

likkha hua tha hijr hamare nasib mein
ye istinad teri tamanna ke rad mein hai

dasht-e-gham-e-firaq mein bhatke hue hain hum
sad-shukr teri yaad hamari rasad mein hai

ahl-e-junun hain razm-gah-e-haq mein jaan-ba-kaf
talqin-e-dast-bastagi bazm-e-khirad mein hai

main kya hun main to khak hun aur meri zindagi
ek amr-e-kun-fakan hai jo khaki jasad mein hai