kis haal-e-be-khudi mein kinare gae the hum
jab zindagi ki samt utare gae the hum

hum par thahar gai thi sar-e-bazm ek nigah
kis sadgi se hae pukare gae the hum

in nim-baz nargisi aankhon se puchhiye
us raat kis tarah se guzare gae the hum

dhoke se hum se par karai gai thi raat
ek subh ki bisat pe mare gae the hum

is bar maut langh ke jaenge shahr-e-ishq
is bar zindagi ke sahaare gae the hum