kisi chashm-e-hunar ki pasbani mein nahin rahna
sitare ko ziyaada der pani mein nahin rahna

ye mitti kyun mere qadmon se lipti hai ki jab main ne
hamesha ke liye duniya-e-fani mein nahin rahna

kahin is dastan mein ek aisa mod aaega
jahan kirdar ne apni kahani mein nahin rahna

tujhe hamrah to rakh lunga main lekin dil-e-sada
teri babat ziyaada khush-gumani mein nahin rahna

mujhe ek aisi duniya bhi basani hai jahan 'shahzad'
kisi ko bhi kisi ki hukmarani mein nahin rahna