kisi harf mein kisi bab mein nahin aaega
tera zikr meri kitab mein nahin aaega

nahin jaegi kisi aankh se kahin raushni
koi khwab us ke azab mein nahin aaega

koi khud ko sahra nahin karega meri tarah
koi khwahishon ke sarab mein nahin aaega

dil-e-bad-guman tere mausamon ko nawed ho
koi khar dast-e-gulab mein nahin aaega

use lakh dil se pukar lo use dekh lo
koi ek harf jawab mein nahin aaega

teri rah takte rahe agarche khabar bhi thi
ki ye din bhi tere hisab mein nahin aaega