kisi ke sath kya nisbat hui thi
main apne-ap se rukhsat hui thi

palat kar pichhe dekha tha zara sa
mujhe khud par badi hairat hui thi

achanak aa gai thi apne aage
achanak baat ki jurat hui thi

khud apna sath bhi chubhne laga tha
ajab tanhai ki aadat hui thi

mere andar bhanwar uthne lage the
samundar se badi wahshat hui thi

bahut sargoshiyan shishe se ki thin
kisi ki mujh se bhi ghibat hui thi