kisi ki sham-e-sadgi sahar ka rang pa gai
saba ke panw thak gae magar bahaar aa gai

chaman ki jashn-gah mein udasiyan bhi kam na thin
jali jo koi sham-e-gul kali ka dil bujha gai

butan-e-rang-rang se bhare the but-kade magar
teri ada-e-sadgi meri nazar ko bha gai

meri nigah-e-tishna-lab ki sarkhushi na puchhiye
ke jab uthi nigah-e-naz pi gai pila gai

khizan ka daur hai magar wo is ada se aae hain
bahaar 'darshan'-e-hazin ki zindagi pe chha gai