kuchh apna pata de kar hairan bahut rakkha
sargarmi-e-wahshat ka imkan bahut rakkha

aisa to na tha mushkil ek ek qadam uthna
is bar ajab main ne saman bahut rakkha

parbat ke kinare se ek rah nikalti hai
dikhlaya bahut mushkil aasan bahut rakkha

kya farz tha har ek ko khushbu ka pata dena
bas bagh-e-mohabbat ko viran bahut rakkha

logon ne bahut chaha apna sa bana dalen
par hum ne ki apne ko insan bahut rakkha