kuchh nazare hain kuchh nazar baqi
aur kuchh kos ka safar baqi

rah gaya hai kitab mein din ki
sham ka bab-e-mukhtasar baqi

is khizan mein bhi kuchh mahakta hai
dil hai baqi abhi jigar baqi

khak hi khak hun magar chhu mat
ishq ka hai abhi sharar baqi

waqt-e-rukhsat palat ke barsi jo
hai nigahon mein wo nazar baqi

dhul gai thi jo tere ashkon se
khat mein wo hi hai ek satar baqi

kasmasate hain panw ke chhaale
hai abhi bhi koi safar baqi