kya kya hain gile us ko bata kyun nahin deta
tazir-e-khata mujh ko suna kyun nahin deta

hain nawak-e-dil-doz mere yar ke tewar
ek bar wo sab tir chala kyun nahin deta

yak-tarfa mohabbat ke tazabzub se to niklun
is raaz se parda wo hata kyun nahin deta

likhta bhi hai mujh ko sar-e-qirtas-e-mohabbat
mazmum jo lagta hun mita kyun nahin deta

itna hi fasurda hai agar haal pe mere
jalwa kabhi apna wo dikha kyun nahin deta

sar-garm-e-safar hun main tere dasht mein kab se
mujh ko meri manzil ka pata kyun nahin deta

khwabida-nasibi bhi to teri hi ata hai
soi meri taqdir jaga kyun nahin deta

jo tab-e-tamasha hi nahin us mein 'raza' tu
wo aatish-e-furqat ko bujha kyun nahin deta