kya rafu ho zindagi sozan juda dhage alag
khwahish-e-dil aalam-e-imkan se lage alag

soch ye bhi tu kabhi ai juzw-e-takmil-e-wajud
jism ho kya mo'atabar saya jahan lage alag

kar-e-la-hasil nahin thi waqt ki bakhiya-gari
par zamana kar raha hai zakhm se dhage alag

manzil-e-hasti talak to sath ke imkan the
yun bhi ho jaana tha ja kar ek zara aage alag

shauq-e-zebaish mein hum ko fikr le aai jahan
khak ka putla jamal-e-khak se lage alag

kya yahi hai aankh ki wadi mein basne ka samar
do parinde umr bhar tadpe alag jage alag

khaliq-e-husn-e-takhayyul hun thikana hai mera
aalam-e-sath-e-nazara se zara aage alag