kyun kahte ho kya meri jafa ko nahin dekha
aate hue kah kah ke qaza ko nahin dekha

aaina-e-kaunain hain donon meri aankhen
tum ko nahin dekha ki khuda ko nahin dekha

dekhe to koi tez-rawi umr-e-rawan ki
phir kar kabhi naqsh-e-kaf-e-pa ko nahin dekha

har khar se yun puchhti hai dasht mein laila
tum ne to kisi aabla-pa ko nahin dekha

kis ghash pe tumhein naz hai ai hazrat-e-musa
un ki nigah-e-hosh-ruba ko nahin dekha

aaina-e-wahdat hai dil-e-saf hamara
kis but mein nazar shan-e-khuda ko nahin dekha