lazzat-e-dard-e-jigar yaad aai
phir teri pahli nazar yaad aai

dard ne jab koi karwat badli
zindagi bar-e-digar yaad aai

pad gai jab tere daman pe nazar
azmat-e-dida-e-tar yaad aai

apna khoya hua dil yaad aaya
un ki makhmur nazar yaad aai

dair o kaba se jo ho kar guzre
dost ki rahguzar yaad aai

dekh kar us rukh-e-zeba pe naqab
apni gustakh nazar yaad aai

jab bhi tamir-e-nasheman ki 'qamar'
yurish-e-barq-o-sharar yaad aai