mere jurm-e-ishq ki is qadar mujhe ai nadim saza na de
mere dil pe itni jafa na kar mujhe yun nazar se gira na de

yahi ek gauhar-e-be-baha meri zindagi ka hai ma-hasal
mujhe dar hai teri ye be-rukhi gham-e-arzu ko mita na de

hai khamosh aatish-e-zindagi magar ek sharar tere ishq ka
mere dil mein ab bhi chamak raha hai use bhi yas bujha na de

ab agarche qabil-e-etibar hai ghair hi ki wafa magar
meri us wafa ko jo e'tibar se gir chuki hai bhula na de

jo mujhe yaqin ho ki main hi tere harim-e-gham ka rafiq hun
to bala se gar mujhe bazm-e-aish mein bar teri ata na de