meri bandagi tujhe de sakegi bajae maani o lafz kya
hai mere shuur ki jholiyon mein siwae maani-o-lafz kya

jo nazar ka bojh na sah sakin wo zaban ka bojh sahengi kya
subuk-o-latif ishaaraton pe jafa-e-maani-o-lafz kya

mujhe dar hai ai sukhan-afrin ye libas un par giran na ho
jo haqiqaten na pahan sakin wo qaba-e-maani-o-lafz kya

na wo shams mein na qamar mein hai wo hijab-e-fikr-o-nazar mein hai
jo hijab-e-fikr-o-nazar utha to ghiza-e-maani-o-lafz kya

meri ruh agarche hai gurisna mera shauq agarche hai jaan-ba-lab
magar ai 'jamil'-e-ghazal-sara ye rida-e-maani-o-lafz kya