meri taraf se nigahen to wo hata lega
wo apne zehn se kaise mujhe nikalega

labon pe phul mohabbat ke jo saja lega
use harif bhi badh kar gale laga lega

gunahgar na ban us ko bad-dua de kar
ghurur us ka use khud hi mar dalega

har ek aag ko wo raushni samajhta hai
main chuk jaun to wo ungliyan jala lega

bahut sambhaal ke rakkha hai aansuo tum ko
meri tarah tumhein aankhon mein kaun palega

agar junun ki had se guzar gaya dariya
to apne sath wo 'sahil' ko bhi baha lega