mujh mein hai kuchh dard bacha so zinda hun
chaaragar ne bol diya so zinda hun

main bas marne hi wala tha phir us ne
honton par ek lams rakha so zinda hun

mujh ko ek faqir ne sikke ke badle
di hogi bharpur dua so zinda hun

socha tha ab maut si nind main sounga
khwab mein kuchh nayab dikha so zinda hun

jina wo bhi hosh mein rah ke mushkil tha
karta hun ab roz nasha so zinda hun

us ne bola yaad mujhe tum mat karna
main ne bhi phir man liya so zinda hun

khwab mein us se roz mila karta tha 'mit'
lekin sach mein nahin mila so zinda hun