muqaddar aazmana chahta hun
tumhaara aastana chahta hun

shab-e-furqat musalsal aansuon se
lagi dil ki bujhana chahta hun

khuda jaane wo kis ka aastan hai
jahan main sar jhukana chahta hun

mujhe bakhsha hai jis ne gham usi ko
sharik-e-gham banana chahta hun

teri makhmur aankhon ke tasadduq
yahin ab dub jaana chahta hun

jahan wo naqsh-e-pa mil jae mujh ko
wahin ka'ba banana chahta hun

na puchh ai 'dard' meri wusat-e-shauq
hudud-e-gham badhana chahta hun