nafrat ke silsile ye adawat ke silsile
jaane kahan gae wo ukhuwwat ke silsile

meri sabhi duaon ka ulta asar hua
tute chale gae teri chahat ke silsile

qaus-e-quzah gulab ruten chahaten teri
ab khwab ho gae wo rifaqat ke silsile

tum se bichhad ke zist mein tanha hi rah gae
kab rakh sake kisi se mohabbat ke silsile

chingari kis ne phenki lagai thi kis ne aag
sab bhul kar badhate hain ulfat ke silsile

ghafil-mabash apne hawalon se le sabaq
bikhre pade hain azm-o-shujaat ke silsile

rishta kitab-o-khama se mazbut kijiye
phir ustuwar honge farasat ke silsile