parda-e-husn-e-zat mein anjuman-e-sifat mein
mere siwa hai aur kaun sina-e-kaenat mein

farsh ki wusaten bhi gum arsh ki rifaten bhi jazb
mere takhaiyyulat mein mere tasawwuraat mein

naghma-e-be-sada hun main naz-e-girah-kusha hun main
shama-e-rah-e-huda hun main zulmat-e-shash-jihat mein

meri hi fitrat-e-qadim sarhad-e-la-makan se dur
mera hi naqsh-e-na-tamam qaid-e-tainat mein

mere wajud-e-khas se silsila-e-fana-baqa
mujh se hi raunaq-e-tamam bazm-e-tajalliyat mein

meri hi fikr-e-makhfi-o-mashq-e-nazar ke faiz se
jazb-o-kashish ki quwwaten hasti-e-be-sabaat mein

'arzu' apne raaz ko samjha hun main bas is qadar
mujh mein hijab-e-zat hai main hun hijab-e-zat mein