phir nae khwab bunen phir nai rangat chahen
zinda rahne ke liye phir koi surat chahen

nae mausam mein karen phir se koi ahd-e-wafa
ishq karne ke liye aur bhi shiddat chahen

ek wo hain ki nazar bhar ke na dekhen hum ko
ek hum hain ki faqat un ki hi surat chahen

baat sunne ke liye hausla dil mein rakkhen
baat kahne ke liye harf-e-sadaqat chahen

un ko pane ke liye tesha-e-farhad banen
qais banne ke liye qais si wahshat chahen

sans qurban karen des pe ek din hum bhi
aisi taqdir mile aisi saadat chahen

hum milen aise ki jon rang mile pani mein
un ki qurbat mein 'hasan' aisi rifaqat chahen