pi kar sharab-e-shauq kun behosh ho behosh ho
jiyun ghuncha lab kun band kar khamosh ho khamosh ho

ho aashiq-e-khunin-jigar jiyun lala is gulzar mein
kha dil pe dagh-e-ashiqi gul-posh ho gul-posh ho

tujh kun agar hai aarzu us khush-ada ke wasl ki
ai dil sarapa shauq mein aaghosh ho aaghosh ho

umda hai dariya dard ka ya-rab mujhe ruswa na kar
aaya hai josh us deg kun sar-posh ho sar-posh ho

majlis mein gham ki ai 'siraj' ab waqt aaya daur ka
gar khun-e-dil maujud hai mai-nosh ho mai-nosh ho