qatra-e-ashk ka mizhgan pe mere ye aalam
subh-dam ghas ki patti pe ho jaise shabnam

hasraten dil ki nikal jatin zara to ai kash
ek hi raat ko mil baithte hum tum baham

sar mein insan ki mansube bhare the kya kya
hae par maut ne sab kar diye darham-barham

be-niyazi ne kiya khun tamanna ka meri
sina mein dil ke tadapne se hai barpa matam

sar se jate rahe ek umr ke shikwe 'hasrat'
mil ke jab baith gae do ghadi hum wo baham