raat ko din kaha nahin jata
yun to suli chadha nahin jata

log to chup hain zulm sah kar bhi
mujh se kyon chup raha nahin jata

aaj to shahr mein hai sannata
kal ho kya kuchh kaha nahin jata

dhup sar pe ho aur sahra ho
panw nange chala nahin jata

jaan har pal rahe hatheli par
is tarah to jiya nahin jata

badh gaya kya bisat se us ki
dil se gham kyon saha nahin jata

jis ko milna hai khak mein 'masud'
us ke aage jhuka nahin jata