roz-e-maulud se sath apne hua gham paida
lala-san dagh uthane ko hue hum paida

hun main wo nakhl ki har shakh meri aara hai
hun main wo shakh ki hon barg-e-tabardam paida

main jo rota hun mere zakhm-e-jigar hanste hain
shadi o gham se kya hai mujhe tauam paida

chahne wale hazaron nae maujud hue
khat ne us gul ke kiya aur hi aalam paida

dard sar mein ho kisi ke to mere dil mein ho dard
waste mere hua hai gham-e-alam paida

zakhm-e-khandan hain be-ainih lab-e-khandan apne
shadmani mein hai yan haalat-e-matam paida

aasman shauq se talwaron ka meinh barsa de
mah-e-nau ne tere abru ka kiya kham paida

kaam apna na hua jab kaji-e-abru se
gesu-e-yar hue darham-o-barham paida

shubh hota hai sadaf ka mujhe har ghunche par
kahin moti na karen qatra-e-shabnam paida

chup raho dur karo munh na mera khulwao
ghafilo zakhm-e-zaban ka nahin marham paida

qulzum-e-fikr mein har-chand lagae ghote
durr-e-mazmun koi yaron se hua kam paida

dost hi dushman-e-jaan ho gaya apna 'atish'
nosh-e-daron ne kiya yan asar-e-sam paida