samne baith ke kuchh baat bhi ho sakti hai
aap chahen to mulaqat bhi ho sakti hai

kis ne samjha hai badalte hue mausam ka mizaj
dhup rahte hue barsat bhi ho sakti hai

hath aai hui bazi pe bahut naz na kar
jitne wale tujhe mat bhi ho sakti hai

wadi-e-shab mein charaghon ka ye lashkar kaisa
koi bhatki hui baraat bhi ho sakti hai

hum ne dekha bhi nahin tum ne pukara bhi nahin
kal yahi wajh-e-shikayat bhi ho sakti hai

hum ne pahle hi khabar-dar kiya tha 'masum'
rah-e-ulfat mein koi ghat bhi ho sakti hai