sar jhuka kar shah ke darbar mein
chhed hum ne sau kiye dastar mein

zindagani jaisi ye anmol shai
kat di hai hasrat-e-be-kar mein

damanon mein bharte hain mahrumiyan
le ke khali jeb hum bazar mein

surkhiyan ban kar ugalti hai lahu
aadamiyat sham ke akhbar mein

sar ko takraate rahe hum umr-bhar
dar koi nikla nahin diwar mein

jis qadar bharta raha unchi udan
aadmi girta gaya mear mein

sab parinde kar gae hijrat 'nabil'
kaun baithe saya-e-ashjar mein