sar se utre nahin phul manzil ki dhun ham-safar baat sun
rah mein khar aaen to talwon se chun ham-safar baat sun

dhup mein to safar sakht dushwar hai be-shajar rah ka
sar ki khatir koi soch saya hi bun ham-safar baat sun

rabta apna zarkhez mitti se rakh aur sarsabz rah
kha gaya kitne sukhe darakhton ko ghun ham-safar baat sun

kuchh bata dil ki dilli se kis lucknow ki taraf ja basen
kaun basti hai jis par barasta hai hun ham-safar baat sun

har qadam par amir is tarah thaharna sochna kis liye
waqt chhalni hai aur is mein pani na pun ham-safar baat sun