sawal-e-lutf-o-karam par qayas kya karte
wo mil bhi jata to hum na-sipas kya karte

har ek shakhs mila dastan-e-dard liye
hum apne zakhm-e-nihan be-libas kya karte

wo ghumta phire le kar jahan mutthi mein
hum apna khauf liye aas-pas kya karte

dil-o-dimagh pe jab ikhtiyar tha us ka
kisi hawale se phir iltibas kya karte

ye sochte the kahen haal-e-dil use lekin
bata ke 'kaif' use dukh udas kya karte