sham-e-be-mehar mein ek yaad ka jugnu chamka
aur phir ek hi chehra tha ki har-su chamka

ai charagh-e-nigah-e-yar main jaan se guzra
ab mujhe kya jo pae dil-zadagan to chamka

roz milte the to be-rang tha tera milna
dur rahne se tere qurb ka jadu chamka

dil mein phir bujhne laga zabt ka tara koi
phir meri nok-e-mizha par koi aansu chamka

taj-e-khusraw ki chamak mand padi jati hai
shahr ke kucha-o-bazar mein lohu chamka

kho gaya hai unhi tarik khalaon mein kahin
wo bhi kya chand tha jis se mera pahlu chamka

main ne jaana ki 'farasat' koi gham-khwar aaya
aks-e-mahtab kuchh is tarah lab-e-ju chamka