sirf patri bani rahi mujh mein
rail-gadi nahin chali mujh mein

kuchh na kuchh kuchh se kuchh nahin bante
aise kuchh kuchh pade kai mujh mein

us ki aankhen banai machis pe
ek cigratte si jal gai mujh mein

gham ke khaliq ne mujh se puri ki
thodi si bhi nahin kami mujh mein

mir ki lek tuk mein atke hain
kuchh riwayat ke mushafi mujh mein

falsafa khauf dukh khushi kuchh sher
rahte hain itne aadmi mujh mein

saste saude mein bechna tha mujhe
mahngi qimat likhi gai mujh mein

ghaur se dekh phir se ek bari
baat ab bhi nahin bani mujh mein

arabi ko nikalta hun main
thuns dete hain farsi mujh mein

jis ko bahar se tha ghataya kabhi
aur andar se badh gai mujh mein

baith sakti ho mere andar tum
ab musibat nahin khadi mujh mein