suna di kis ne rudad-e-gham-e-dil kohsaron ko
main akasr sochta hun dekh kar in aabshaaron ko

gae mausam ka ek pila sa patta shakh par rah kar
na jaane kya batana chahta hai in bahaaron ko

chale aao na rokega ghubar-e-rah ab tum ko
ki pur-nam kar diya ashkon se main ne rahguzaron ko

samajh pae hain in ko aur na samjhenge khirad wale
dil-e-ashiq samajh leta hai jin mubham ishaaron ko

khabar-name ki surkhi mein unhin ka zikr tha 'nazim'
batae the jo main ne raaz apne raaz-daron ko