tegh apni jagah dar apni jagah
aur haqiqat ka izhaar apni jagah

ab khandar hai khandar hi kaho dosto
shish-mahlon ke aasar apni jagah

tur par lakh musa se ho guftugu
arsh-e-azam pe didar apni jagah

awwalan haq ne takhliq jis ko kiya
sab ke baad us ka izhaar apni jagah

mukhtasar ye bata sar-ba-kaf kaun tha
jit apni jagah haar apni jagah

bhai se bhai ke kuchh taqaze bhi hain
sahn ke beach ki diwar apni jagah