tere jalwe se mere dil ka farozan hona
ek zarre ka hai khurshid-ba-daman hona

jab kisi ghunche ka munh chumti hai mauj-e-nasim
yaad aata hai tere lab ka gulistan hona

kis ko fursat hai ki har but ka jigar chaak kare
warna mushkil to na tha kufr ka iman hona

ab kahan jaun ye aashob-e-tamanna le kar
dard ko aa gaya mizrab-e-rag-e-jaan hona

sans lene ko musafir ki tarah thahre the
hae us saya-e-diwar ka zindan hona