teri talash teri tamanna to main bhi hun
jaisa tera khayal hai waisa to main bhi hun

tamir jaisi chahiye waisi na ho saki
buniyaad apni roz uthata to main bhi hun

bosida chhaal ped se lipti hai gar to kya
achchhe dinon ki aas pe zinda to main bhi hun

ai zindagi mujhe to khabar tak na ho saki
har-chand apne gham ka mudawa to main bhi hun

mahrumi-e-hayat ka mujh ko bhi gham to hai
mahrumi-e-hayat pe rota to main bhi hun

shayad nikal hi aae yahan koi rasta
is shahr-e-be-lihaz mein thahra to main bhi hun

ai zindagi to kis liye mayus mujh se hai
teri tawaqquat pe pura to main bhi hun

nok-e-qalam pe surat-e-izhaar ye bhi hai
tujh ko ghazal ke rup mein likhta to main bhi hun

ai zindagi tu thamti mere wajud ko
tere liye jahan mein bhatka to main bhi hun

ai kash jaan le tu mere dil ki dastan
tum ho to zindagi ka taqaza to main bhi hun

mujh mein jo iztirab hai mere sabab se hai
mujh se na kuchh kaho ki samajhta to main bhi hun

ye kya ki khwahishon ka safar khatm hi na ho
ye kya ki ek mod pe thahra to main bhi hun

ye kya ki ek taur se guzregi zindagi
ye kya ki ek rah pe chalta to main bhi hun

rakhta nahin hun dil mein hawaon ka kuchh bhi khauf
rahon mein teri dip jalata to main bhi hun

tum aae aur samet ke duniya nikal gae
is umr ke sarab mein bhatka to main bhi hun

main bhi dukhon se mawara kab hun jahan mein
bar-e-gham-e-hayat uthata to main bhi hun

main bhi bhatak raha hun zamane ke sath sath
andha agar jahan hai andha to main bhi hun

tere bayan mein hai na mere bayan mein
is zindagi ko dekh dikhata to main bhi hun

kuchh raushni ki aas hai mujh ko bhi ai 'nabil'
aankhon ke dip roz jalata to main bhi hun

hansti hai mujh pe duniya to hansti rahe 'nabil'
is ke muamlat pe hansta to main bhi hun

ruk se gae 'nabil' ye kis ke khayal mein
tu dekh ghaur se mujhe rukta to main bhi hun