teri yaaden bahaal rakhti hai
raat dil par wabaal rakhti hai

shab-e-gham ki ye ragni ban mein
bansuri jaisi tal rakhti hai

dil ki wadi se uthne wali kiran
wahshaton ko ujal rakhti hai

baam-o-dar par utarne wali dhup
sabz rang-e-malal rakhti hai

sham khulti hai tere aane se
lab pe tera sawal rakhti hai

ek ladki udas safhon mein
ek jazira sambhaal rakhti hai

aakhiri dip ki larazti lau
mahr o mah sa jamal rakhti hai