tirgi chand ko inam-e-wafa deti hai
raat-bhar dubte suraj ko sada deti hai

main ne chaha tha ki lafzon mein chhupa lun khud ko
khamushi lafz ki diwar gira deti hai

koi saya to mila dhup ke zindani ko
meri wahshat teri chahat ko dua deti hai

kitni sadiyon ke dariche mein hai bas ek wajud
zindagi sans ko talwar bana deti hai

qafas-e-rang mein din raat wahi pyas ka dard
aagahi bhi mujhe jine ki saza deti hai