tujh pe har haal mein marna chahun
main to ye kaam hi karna chahun

hasil-e-zist hai jurm-e-ulfat
mar ke bhi main na mukarna chahun

apne uslub mein chahun jina
apne andaz mein marna chahun

mutawajjah kare koi to use
misl-e-gul main bhi nikharna chahun

kitna mahdud hua jata hun
main ki har had se guzarna chahun

ek jugnu hun magar dekh andaz
subh ki tarah bikharna chahun

surat-e-naghma-e-jaan ai 'ruhi'
main tere dil mein utarna chahun