tum ne ye majra suna hai kya
jo bhi hona hai ho chuka hai kya

wo musafir jo raste mein tha
manzilon se guzar gaya hai kya

koi hota nahin hai aap ke sath
aap ke sath masala hai kya

ye jo tadbir kar raha hun main
ye bhi taqdir mein likha hai kya

sochne wali baat hai 'imrran'
koi ye baat sochta hai kya

dal badal jae ghar badal jae
aadmi ka koi pata hai kya

kya hai ye mustatil tanhai
ye udasi ka daera hai kya

ghaur se kaun dekhta hai yahan
in charaghon mein jal raha hai kya

kyun wo sar par sawar hai 'imrran'
tere dil se utar gaya hai kya