ubharte chand sitaron ka tazkira bhi karo khizan ke sath bahaaron ka tazkira bhi karo gulon ki chhanw mein aaram karne walo kabhi hamari rah ke kharon ka tazkira bhi karo hamesha sail-o-talatum ka zikr karte ho sukun-ba-dosh kinaron ka tazkira bhi karo rabab-o-chang ke naghmon se gar mile fursat shikasta saz ke taron ka tazkira bhi karo khizan ki god mein aankhon ko kholne walo nazar-nawaz bahaaron ka tazkira bhi karo hasin chandni raaton se khelne walo sahar ke dubte taron ka tazkira bhi karo hamesha zikr-e-shab-e-tar kis liye 'saqi' kabhi sahar ke nazaron ka tazkira bhi karo